Policia ka nisur hetimin për katër futbollistë të Erzenit dhe Partizanit, të kategorisë U-21, pasi ndeshja mes tyre në stadiumin “Tofik Jashari” degjeneroi në dhunë, grushte, ofendime dhe shkelma. Superliga shqiptare e futbollit për moshat U-21 zhvilloi raundin e 19-të, por sfida mes dy skuadrave degjeneroi në një konfrontim të dhunshëm.

Futbollistët Jorgis Hasanas, 20 vjeç, Ralf Çela, 20 vjeç, Joel Serna, 18 vjeç, dhe M. D., 22 vjeç, janë vënë në hetim për veprat penale të plagosjes së lehtë me dashje, dëmtimit të tjera me dashje, shkatërrimit të pronës dhe prishjes së qetësisë publike.

Ndërkaq, dy prej futbollistëve që përfunduan në spital pas konfrontimit, pas mjekimit kanë lënë spitalin ditën e martë të 16 prillit. Ndeshja përfundoi me rezultatin 2-2, me Partizanin që mban vendin e dytë dhe Erzenin në pozitën e tretë në renditjen e Superligës për moshat U-21.