Rreth 10 protestues kanë kaluar natën përpara godinës së Kryeministrisë në Tiranë, duke vijuar qëndrimin e tyre në bulevardin “Dëshmorët e Kombit”.

Të ulur në karrige metalike dhe me flamuj shqiptarë, protestuesit kanë vendosur të mos tërhiqen, duke e shndërruar qëndrimin e tyre në vijimësi të protestës që ka përfshirë kryeqytetin prej disa ditësh.

Ndërkohë, policia ka bllokuar një pjesë të segmentit rrugor nga Ura e Lanës deri te Kryeministria, si masë sigurie dhe për menaxhimin e qarkullimit në zonë. Edhe dy netë më parë, protestuesit kishin qëndruar gjatë natës në të njëjtin bulevard.

Gjatë protestës së fundit, u lexuan edhe kërkesat e pjesëmarrësve drejtuar qeverisë dhe kryeministrit Edi Rama, nga ish-luftëtari i UÇK-së Dritan Goxhaj. Kërkesat përfshijnë dorëheqjen e kryeministrit, krijimin e një qeverie teknike dhe kufizimin e mandatit të kreut të qeverisë në maksimum dy mandate.

Në listën e kërkesave të lexuara nuk është përfshirë opozita e drejtuar nga Sali Berisha, një detaj që është vënë re nga pjesëmarrësit dhe vëzhguesit e protestës.

Protesta vijon të mbetet e hapur, ndërsa autoritetet nuk kanë dhënë ende një afat për përfundimin e masave të sigurisë në zonën përreth institucionit të qeverisë.