Gjermania ka ndërmarrë një paketë emergjente masash për të zbutur ndikimin e rritjes së çmimeve të energjisë, duke vendosur ulje të përkohshme të taksës së karburantit.

Sipas vendimit të qeverisë, taksa për benzinën dhe naftën do të ulet me 17 cent për litër për një periudhë dy mujore, në përpjekje për të lehtësuar barrën financiare mbi familjet dhe bizneset.

Kancelari Friedrich Merz paralajmëroi se pasojat ekonomike të konfliktit në Lindjen e Mesme do të ndihen për një kohë të gjatë, duke theksuar se qeveria do të përdorë të gjitha mjetet në dispozicion për të mbështetur ekonominë.

Në kuadër të paketës, bizneseve u jepet gjithashtu mundësia të ofrojnë bonuse për punonjësit deri në 1,000 euro pa taksa gjatë vitit 2026, si një formë mbështetjeje direkte për të ardhurat.

Vendimi vjen në një moment delikat për ekonominë gjermane, e cila ka shfaqur shenja dobësie vitet e fundit, ndërsa rritja e çmimeve të energjisë rrezikon të ngadalësojë më tej rimëkëmbjen ekonomike.