Tokë, apartamente e pasuri të tjera janë sekuestruar në Vlorë nga Gjykata pas kërkesës së prokurorisë, e cila ka ngritur akuzën për prodhim dhe trafik droge për pronarin e tyre.

Gjykata e Shkallës së Parë Vlorë me kërkesë të Prokurorisë, ka vendosur sekuestro preventive mbi disa pasuri që janë në pronësi të tre personave.

Sipas Prokurorisë, pasuritë në emër të të afërmëve të shtetasit I.Z, që është në hetime, për veprat penale “Prodhimi dhe shitja e narkotikëve” dhe “Trafikimi i narkotikëve”, dyshohet dhe ka të dhëna të mjaftueshme se zotërohen në mënyrë të tërthortë nga i akuzuari.

Mes pasurive të sekuestruara janë toka, apartamente banimi, dyqan dhe makinë.

Njoftimi

Vlorë, 30 korrik 2021. Prokuroria pranë Gjykatës së Shkallës së Parë Vlorë në bazë të ligjit 10192, datë 03.12.2009 “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë”, i ndryshuar, ka regjistruar dhe po kryen hetime për procedimin pasuror penal nr. 3, datë 26.07.2021, që bën fjalë për pasuritë në zotërim të shtetasit I.Z., i dyshuar për kryerjen e veprave penale “Prodhimi dhe shitja e narkotikëve” dhe “Trafikimi i narkotikëve” të parashikuar nga nenet 283 dhe 283/a të Kodit Penal, si dhe pasuritë në emër të të afërmve të tij dhe personat fizikë, konkretisht shtetasve E.Z dhe Ll.Z., për të cilët ka të dhëna të mjaftueshme se pasuritë e tyre zotërohen në mënyrë të tërthortë nga shtetasi I.Z.

Në funksion të këtij procedimi pasuror, mbi bazën e kërkesës së prokurorit, Gjykata e Shkallës së Parë Vlorë me vendimin nr. 237, datë 29.07.2021, ka vendosur: Caktimin e masës së sigurimit personal pasuror sekuestro preventive mbi pasuritë (2 pasuri të paluajtshme të llojit arë, 4 apartamente banimi, 2 poste parkimi, 1 njësi tregtare dyqan dhe 1 autoveturë)

1. Pasuri e llojit “arë”, me sipërfaqe 702 m² Siptallë.
2. Pasuria e llojit “arë”, me sipërfaqe 902 m2, Siptallë.
3. Apartament banimisipërfaqe 109 m², në Sarandë, porositur nga shtetasja E.Z.
4. Apartament banimi” me sipërfaqe 77.75 m² Sarandë.
5. Apartamentme sipërfaqe 110.07 m² në Tiranë, në zotërim të shtetasit Ll.Z.
6. Apartament me sipërfaqe 70.03 m² të ndodhur në rr. Kavajës, Tiranë, në zotërim të shtetasit Ll.Z.
7. Post parkimi me sipërfaqe të shfrytëzueshme 12.5 m², Tiranë, në zotërim të shtetasit Ll.Z.
8. Post parkimi me sipërfaqe të shfrytëzueshme 12.5 m², ndodhur në Tiranë, në zotërim të shtetasit Ll.Z.
9. Njësi tregëtare (dyqan)” me sipërfaqe 291 m², porositur nga shtetasja E.Z.
10. Autoveturë e markës “Toyota”, Tipi “J12”, modeli “Land Criuser”, në pronësi të shtetasit I.Z.

Në zbatim të vendimit gjyqësor dhe nenit 14 e vijues të ligjit nr. 10192, datë 03.12.2009 “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë”, i ndryshuar,  është nxjerrë nga prokurori urdhëri i ekzekutimit, i cili u është dërguar për ekzekutim/zbatim shërbimeve e policisë gjyqësore të Drejtorisë Vendore të Policisë Vlorë, Agjencisë së Administrimit të Pasurive të Sekuestruara dhe të Konfiskuara pranë Ministrisë së Financave, Tiranë, si dhe Agjencisë Shtetëror të Kadastrës dhe Drejtorisë së Përgjithshme të Shërbimit të Transportit Rrugor Tiranë.