Gjykata Themelore në Ferizaj ka vendosur masën e paraburgimit prej një muaji ndaj reperit Betim Januzi, i njohur për publikun me emrin artistik “Buta”.

Vendimi vjen pas një ngjarjeje të ndodhur më 11 prill 2026, ku sipas autoriteteve, një përleshje mes dy personave ka eskaluar deri në përdorimin e një arme të ftohtë dhe një arme zjarri, duke rrezikuar jetën e të përfshirëve dhe të personave përreth.

Sipas njoftimit zyrtar, Gjykata ka vlerësuar se ekziston dyshim i bazuar për kryerjen e veprave penale dhe ka aprovuar kërkesën e Prokurorisë Themelore në Ferizaj për caktimin e masës së paraburgimit.

Nga të dhënat e dosjes hetimore, njëri prej të përfshirëve dyshohet se ka përdorur thikë gjatë konfliktit, duke shkaktuar lëndime trupore, ndërsa reperi B.J. akuzohet për shkaktim të rrezikut të përgjithshëm dhe mbajtje të paautorizuar të armës së zjarrit, pasi gjatë përleshjes dyshohet se ka qëlluar dy herë në drejtim të tokës.

Gjykata thekson se masa e paraburgimit është caktuar për të dyshuarit për një periudhë prej një muaji, ndërsa ankesa ndaj këtij vendimi nuk pezullon zbatimin e tij.