Një konflikt i dhunshëm i regjistruar në kryeqytet ka përfunduar me plagosjen e dy personave, mes tyre edhe shtetasi Dritan Aga.

Ngjarja ka ndodhur në zonën e Ali Demit, pranë minibashkisë, ku sipas informacioneve paraprake, Dritan Aga ishte duke hedhur mbeturina kur është përfshirë në një debat verbal me një person tjetër. Konflikti ka degjeneruar më pas në dhunë fizike, ku Aga është goditur me mjet prerës.

Policia e Tiranës ka dhënë detaje paraprake mbi ngjarjen:

“Në rrugën ‘Hodo Beg’, gjatë një konflikti dyshohet për motive të dobëta, është dëmtuar me mjet prerës shtetasi D. A., rreth 41 vjeç, si dhe me grushte shtetasi J. G., rreth 61 vjeç.”

Sipas uniformave blu, autori i dyshuar është identifikuar si shtetasi E. J., 32 vjeç, i cili pas ngjarjes është larguar nga vendi i incidentit.

“Autori i dyshuar i rastit është shtetasi E. J., rreth 32 vjeç, i cili është larguar nga vendngjarja. Shërbimet e Policisë po punojnë për lokalizimin dhe kapjen e tij,” njofton policia.

Të plagosurit janë transportuar në spital, ku po marrin ndihmën mjekësore dhe fatmirësisht ndodhen jashtë rrezikut për jetën.

Ndërkohë, grupi hetimor vijon punën për zbardhjen e plotë të rrethanave dhe dokumentimin e ngjarjes.