Dy turistët gjermanë, të cilët u raportuan të zhdukur në zonën malore të Polisit në Librazhd, janë gjetur nga policia dhe ndodhen në gjendje të mirë shëndetësore.

Sipas informacioneve paraprake, turistët janë lokalizuar pranë fshatit Stravaj, pas disa orësh kërkimesh në terrenin e vështirë malor.

Mësohet se ata kishin hasur probleme me automjetin e tyre dhe, pasi e kishin braktisur mjetin, kishin vijuar rrugën në këmbë në përpjekje për të gjetur një dalje ose ndihmë. Gjatë lëvizjes në zonë, ata kanë parë rastësisht një furgon që kalonte aty pranë.

Burime bëjnë me dije se gjatë itinerarit të ecjes në një zonë të thellë të Malësisë së Polisit, turistët humbën kontaktet me guidën që i shoqëronte, çka ngriti alarmin për zhdukjen e tyre.

Pas njoftimit, forcat e policisë nisën menjëherë operacionin e kërkimit, duke bërë të mundur gjetjen e dy shtetasve gjermanë. Fatmirësisht, ata nuk kanë pësuar lëndime dhe janë jashtë rrezikut.

Autoritetet po vijojnë verifikimet për të sqaruar plotësisht rrethanat e incidentit që alarmoi zonën dhe aktivizoi ekipet e kërkim-shpëtimit.