Një 42-vjeçar i shpallur në kërkim ndërkombëtar është arrestuar në Itali me qëllim ekstradimin drejt Shqipërisë, në kuadër të operacionit të koduar “The Wanted”.

Sipas njoftimit të Policisë së Shtetit, në pranga ka rënë Sefer Selimaj alias Ani Ibraliu, i dënuar nga Gjykata e Apelit në Tiranë me 15 vite burg për veprën penale “Trafikimi i qenieve njerëzore”.

Arrestimi u bë i mundur falë koordinimit të informacioneve dhe veprimeve operacionale mes specialistëve të Interpol Tiranës dhe Interpol Romës.

Autoritetet shqiptare bëjnë me dije se nga dënimi i dhënë në vitin 2017, 42-vjeçarit i kanë mbetur ende për të vuajtur 13 vjet, 10 muaj dhe 19 ditë burgim.

Policia thekson se bashkëpunimi me autoritetet italiane vijon për përfundimin e procedurave të ekstradimit, me qëllim që i dënuari të sillet në Shqipëri për të vuajtur pjesën e mbetur të dënimit.