Policia e Shkodrës ka vënë në pranga një nga personat e dyshuar për dhunimin e drejtorit të Autoritetit Kombëtar të Ushqimit (AKU) në Shkodër, Romir Haderi. Në kuadër të hetimeve është arrestuar shtetasi Elis Çela, banues në lagjen “Kiras”, i cili dyshohet se ka ndihmuar autorin e sulmit duke e transportuar me automjet para dhe pas ngjarjes.

Sipas burimeve policore, është identifikuar edhe personi që dyshohet si autori kryesor i sulmit ndaj Haderit. Ai është shpallur në kërkim dhe po vijojnë veprimet për lokalizimin dhe arrestimin e tij.

Ngjarja ndodhi mbrëmjen e 21 majit në lagjen “Rus” të Shkodrës, ku drejtori i AKU-së u godit me një send të fortë nga një person që më pas u largua në drejtim të paditur. Si pasojë e sulmit, Haderi mori një plagë në vetull dhe pas marrjes së ndihmës mjekësore në spital u largua drejt banesës.

Një ditë pas incidentit, Romir Haderi reagoi publikisht duke deklaruar: “Asgjë nuk do të më ndal.”

Hetimet paraprake dyshojnë se sulmi mund të ketë lidhje me detyrën e tij si drejtues i AKU-së. Sipas pistave që po verifikohen, personat e përfshirë mund të kenë vepruar kundrejt pagesës, ndërsa porositësit e mundshëm dyshohet se janë persona të tjerë.

Policia e Shkodrës dhe grupi hetimor vijojnë punën për zbardhjen e plotë të ngjarjes, identifikimin e të gjithë personave të përfshirë dhe dokumentimin e motiveve të sulmit.