Drejtoria Vendore e Policisë Durrës ka njoftuar arrestimin e shpejtë të një 42-vjeçari, i dyshuar për vjedhjen e një ore dore nga një shtetas italian rezident në Shqipëri, ndërsa sendi i marrë u është kthyer menjëherë pronarit.

Ngjarja është zbardhur pas publikimit të një videoje në portalin “JOQ”, ku shihej momenti i vjedhjes në një lokal në lagjen nr. 11 të qytetit bregdetar.

Menjëherë pas denoncimit publik, policia thotë se ka organizuar punën për identifikimin dhe kapjen e autorit.

“Si rezultat, u identifikua, u kap dhe u vu në pranga autori i dyshuar i vjedhjes, shtetasi E. K., 42 vjeç, banues në Durrës”, njofton policia.

Sipas njoftimit zyrtar, ora e vjedhur është gjetur dhe i është kthyer pronarit, i cili ka falënderuar policinë për reagimin e shpejtë, si dhe median për publikimin e rastit.

“Policia e Shtetit mbetet e angazhuar maksimalisht për garantimin e rendit dhe sigurisë publike”, thuhet në përfundim të deklaratës.