Detaje të reja kanë dalë nga përplasja e fortë mes ortakëve të kompanisë “Finman SH.P.K”, menjëherë pas mbledhjes së Asamblesë së Shoqërisë, e cila zotëron aksione në disa kompani të mëdha si “AlbStar SHPK” dhe “Manastiri Resort”.
Sipas raportimeve, konflikti ka eskaluar pas akuzave të ngritura nga ortaku Sokol Agalliu, i cili pretendon se nga arka e kompanisë janë përvetësuar rreth 500 milionë lekë të reja.
Nga ana tjetër, sipas burimeve të cituara në denoncim, ortaku kryesor Idajet Ismailaj dhe djali i tij Florid Ismailaj, të shoqëruar nga persona të sigurisë, kanë ushtruar dhunë fizike ndaj Agalliut dhe djalit të tij, duke e shoqëruar konfliktin edhe me kërcënime për jetën.
“Së bashku me bodyguard-ët e tyre, kanë dhunuar fizikisht me grushte dhe kanë kërcënuar me jetë djalin e ortakut tjetër”, thuhet në pretendimet e palës së përfshirë në konflikt.
Sipas të njëjtave burime, Sokol Agalliu ndodhet aktualisht në urgjencën e një spitali privat në Tiranë dhe gjendja e tij raportohet e rënduar.
Përplasje që vijon prej një jave
Ngjarja nuk është e izoluar. Rreth një javë më parë, në zyrat e “Finman SH.P.K” është regjistruar një tjetër incident mes Agalliut dhe stafit të kompanisë.
Fillimisht ka pasur një debat verbal, i cili më pas ka degjeneruar në përplasje fizike, ku një jurist i kompanisë është goditur nga Agalliu. Pas kallëzimit, ai është ndaluar nga policia dhe më pas është liruar nga Gjykata e Tiranës me masë më të lehtë pas 72 orësh.
Më vonë, sipas raportimeve, Agalliu është rikthyer në ambientet e kompanisë, duke kërkuar pjesëmarrje në mbledhjen e bordit drejtues, por nuk është lejuar për shkak të tensioneve të mëparshme.
“Pika e voçkël” e Manastirit
Emri i “Manastiri Resort” rikthen në vëmendje edhe debatet publike të mëparshme për ndërtimet në zonën e Butrintit, ku ishte përdorur termi “pika e voçkël” nga ministrja Mirela Kumbaro për të përshkruar ndërhyrjet në Gjirin e Manastirit, që më pas u lidhën me zhvillime turistike dhe u shoqëruan me kritika të forta nga ekspertë dhe opozita për ndikimin mjedisor.
