Gati 130 mijë klientë në Hawaii kanë mbetur pa energji elektrike pasi uragani Lala kaloi pranë Ishullit të Madh, përpara se të dobësohej dhe të klasifikohej si stuhi tropikale.

Të dhënat nga një platformë që monitoron ndërprerjet e energjisë treguan se pjesa më e madhe e zonave të prekura ndodhej në Ishullin e Madh, si dhe në qarqet Honolulu dhe Maui.

Kompania “Hawaiian Electric” kishte paralajmëruar përdoruesit se puna për riparimin e defekteve po pengohej nga erërat e forta dhe reshjet intensive, ndërsa rrugët e përmbytura dhe pemët e rrëzuara e kanë vështirësuar më tej ndërhyrjen.

Autoritetet kanë raportuar një viktimë në një incident të lidhur me një automjet. Sipas të dhënave të Shërbimit Kombëtar Meteorologjik, dy banesa janë marrë nga rrjedhat e ujit.

Edhe pse Shërbimi Kombëtar i Motit në SHBA e ka ulur klasifikimin e Lalës në stuhi tropikale, erërat maksimale të qëndrueshme prej rreth 70 miljesh në orë, ose 113 km/h, mbetën pranë pragut të një uragani.

Qendra Kombëtare e Uraganeve vijoi paralajmërimet për kushte potencialisht kërcënuese për jetën.

Një ditë më parë, erërat maksimale të qëndrueshme të Lalës arritën rreth 120 km/h, duke e klasifikuar përkohësisht sistemin si uragan të Kategorisë 1.