Vala e tretë e të nxehtit këtë verë pritet të arrijë kulmin në Itali gjatë orëve në vijim, duke detyruar autoritetet të rrisin nivelin e alarmit në disa zona të vendit.

Të premten, më 17 korrik, 16 qytete italiane do të jenë nën alarm të kuq për shkak të temperaturave ekstreme, ndërsa një ditë më parë ishin 15 qytete dhe të mërkurën shtatë qytete.

Në listën e qyteteve nën “kod të kuq” janë përfshirë: Bolonja, Brescia, Bari, Campobasso, Firence, Frosinone, Xhenova, Latina, Milano, Palermo, Perugia, Pescara, Rieti, Roma, Torino dhe Viterbo.

Ndërkohë, qytetet Ankona, Civitavecchia, Messina dhe Napoli mbeten nën alarm portokalli, ku temperaturat e larta konsiderohen veçanërisht të rrezikshme për grupet më të cenueshme të popullsisë.

Krahas të nxehtit ekstrem, disa zona të veriut të Italisë pritet të përballen me ndryshime të forta atmosferike. Autoritetet kanë lëshuar paralajmërime për stuhi të fuqishme në rajonin e Lombardisë, me rrezik për reshje intensive shiu dhe breshër në zonën e Luginës së Po-së.

Gjithashtu, rajonet Emilia-Romagna dhe Veneto janë vendosur nën alarm të verdhë për shkak të kushteve të paqëndrueshme të motit.

Autoritetet u kanë bërë thirrje qytetarëve të tregojnë kujdes, veçanërisht personave të moshuar, fëmijëve dhe atyre me probleme shëndetësore, gjatë orëve me temperaturat më të larta.