Një prej organizatorëve të protestës, Ilir Xhemalaj, ka kërkuar nga kryeministri Edi Rama që të shpallë “non grata” ministren serbe të Administratës Shtetërore dhe Vetëqeverisjes Lokale, Snezhana Paunoviç, pas deklaratave të saj për Kosovën.

Gjatë fjalës së tij nga tubimi para Kryeministrisë, Xhemalaj kritikoi qeverinë shqiptare për mungesën e një reagimi zyrtar ndaj deklaratave të ministres serbe, e cila pak ditë më parë tha se, nëse do të kishte qenë në vend të Sllobodan Millosheviqit në vitin 1998, do ta kishte “spastruar etnikisht Kosovën”.

“Ka 48 orë që një ministre serbe ka shpallur se do të bënte spastrim etnik mbi shqiptarët. I kërkoj qeverisë dhe kryeministrit Edi Rama, i cili deri më sot nuk ka bërë asnjë deklaratë dhe nuk ka mbajtur asnjë qëndrim zyrtar të qeverisë ndaj kësaj zonje, duhet që ta shpallin non grata”, u shpreh Xhemalaj.

Ai vijoi akuzat ndaj kryeministrit Rama dhe presidentit serb Aleksandar Vuçiç, duke deklaruar se protesta ka mbajtur një qëndrim të qartë ndaj tyre.

“Ky shesh e ka shpallur non grata ministren serbe, Edi Ramën dhe Vuçiçin. Ishte në Bruksel dhe kërkoi të na hidhte hi syve. Rama sot ka dalë lakuriq para gjithë botës”, tha organizatori i protestës.

Deklaratat e ministres serbe Snezhana Paunoviç kanë shkaktuar reagime të shumta në Kosovë, Shqipëri dhe në institucionet evropiane, ndërsa autoritetet e Kosovës kanë vendosur t’i ndalojnë hyrjen në territorin e tyre.