E ardhmja e Kenan Yildiz po kthehet në një nga dosjet më të ndjeshme në ambientin bardhezi. Talenti i lindur në vitin 2005 ka kontratë me Juventusin deri në vitin 2029, por interesimi në rritje nga klubet e mëdha evropiane ka shtyrë drejtuesit të mendojnë për një rinovim të hershëm dhe përmirësim të kushteve financiare.

Vetë lojtari, megjithatë, zgjedh të qëndrojë larg zhurmës.
“Kontrata? Nuk flas për të. Jam i përqendruar vetëm te fusha dhe te ajo që duhet të bëj këtu. Ndihem mirë te Juventusi dhe kjo është gjëja më e rëndësishme. Këtu është shtëpia ime”, deklaroi Yildiz.

Pas fitores së Juventusit ndaj Benficës, në një intervistë për TRT Spor, ai u ndal te objektivat në Champions League:
“Champions-i është gjithmonë i veçantë, por duhet përgatitur si çdo ndeshje tjetër, edhe në Serie A. Duhet të japim 100%. Stërvitemi mirë dhe punojmë shumë, sepse në Champions duam të shkojmë deri në fund”.

Yildiz komentoi edhe vlerësimet e trajnerit të Italisë, Luciano Spalletti:
“Ka thënë se më do si djalin e tij. Te Juventusi ndihem shumë mirë, kjo është skuadra ime. Me trajnerin kam një marrëdhënie të veçantë”.

Sa i përket krahasimeve me Lamine Yamal, talenti bardhezi tregoi maturi:
“Është një lojtar i madh, ndër më të fortët në botë. Nuk më pëlqejnë krahasimet, dua vetëm të përmirësohem dhe të jap maksimumin për Juventusin dhe tifozët”.

Në Torino, mes interesimit të jashtëm dhe deklaratave të qarta të lojtarit, një gjë duket e sigurt: Kenan Yildiz, të paktën për momentin, e sheh të ardhmen e tij të lidhur fort me fanellën bardhezi.