Prokuroria e Posaçme kundër Korrupsionit dhe Krimit të Organizuar ka përgënjeshtruar zyrtarisht lajmet e publikuara së fundmi lidhur me sekuestrimin e telefonit të Drejtorit të Përgjithshëm të Policisë së Shtetit, Ilir Proda.

Në kuadër të programit të transparencës, SPAK është pyetur nëse ndaj kreut të Policisë së Shtetit është ndërmarrë një veprim i tillë hetimor. Në përgjigjen zyrtare, Prokuroria e Posaçme sqaron se një gjë e tillë nuk ka ndodhur.

“Në përgjigje të kërkesës suaj, ju informojmë se Byroja Kombëtare e Hetimit (BKH) nuk e ka sekuestruar telefonin e Drejtorit të Policisë së Shtetit”, thuhet në reagimin e SPAK.

Ky sqarim vjen pas raportimeve që kishin nxitur debat publik dhe spekulime mbi përfshirjen e drejtuesit të Policisë në veprime hetimore. SPAK nuk ka dhënë detaje të tjera lidhur me çështjen, duke theksuar vetëm se informacionet për sekuestrimin e telefonit janë të pavërteta.