Është publikuar fotoja e Ferdinand Ballës, 51-vjeçarit të arrestuar nga Policia e Tiranës në zonën e Freskut, pasi u kap me 811 gramë lëndë të dyshuar narkotike të llojit kokainë.

Sipas hetimeve paraprake, sasia e drogës dyshohet se ishte destinuar për t’u shpërndarë në doza në zona të ndryshme të kryeqytetit. Burime mediatike raportojnë se nga shitja e saj ai mund të siguronte përfitime që arrinin deri në 15 mijë euro.

Rasti ka tërhequr vëmendje të veçantë për shkak të dyshimeve se kokaina ishte fshehur në çantën me sendet personale të vajzës së tij 8-muajshe. Në momentin e ndërhyrjes së policisë, pranë 51-vjeçarit ndodhej edhe foshnja në karrocë.

Policia ka sekuestruar lëndën e dyshuar narkotike si provë materiale, ndërsa vijojnë hetimet për të dokumentuar plotësisht aktivitetin e dyshuar kriminal dhe për të identifikuar persona të tjerë që mund të jenë të përfshirë në këtë rast.

51-vjeçari pritet të përballet me akuzat për veprat penale që lidhen me posedimin dhe shpërndarjen e lëndëve narkotike, ndërsa dosja i është referuar organit të akuzës për veprime të mëtejshme.