Policia e Sarandës ka vënë në pranga 43-vjeçarin Klementin Islamaj, nga fshati Shalës në Konispol, i cili ishte shpallur në kërkim pas një vendimi gjykate që e dënon me burg për një ngjarje të rëndë familjare të ndodhur dy vite më parë.

Sipas njoftimit zyrtar, Gjykata e Shkallës së Parë e Juridiksionit të Përgjithshëm Sarandë e ka dënuar atë me 3 vite e 4 muaj burg për veprën penale “Vrasja e kryer në gjendje të tronditjes së fortë psikike”.

Ngjarja daton në gusht të vitit 2024, kur Islamaj dyshohet se ka shtyrë nga shkallët të atin, Hysen Islamaj, duke i shkaktuar vdekjen. Ky episod tragjik ndodhi pas një konflikti të rëndë familjar, i cili kishte paraprirë nga një tjetër ngjarje edhe më e rëndë në familje.

Sipas të dhënave hetimore, pak më herët babai i viktimës kishte vrarë me sëpatë bashkëshorten e tij, 66-vjeçaren Shano Islamaj, duke e kthyer familjen në qendër të një tragjedie të dyfishtë që u zhvillua para syve të fëmijëve të autorit, të cilët ndodheshin në banesë në momentin e ngjarjeve.

Autoritetet bëjnë me dije se arrestimi i 43-vjeçarit është kryer në zbatim të vendimit gjyqësor, ndërsa ai do të vuajë dënimin e dhënë nga gjykata.

Hetimet dhe dokumentimi i plotë i ngjarjes së rëndë familjare vijojnë të mbeten pjesë e dosjes penale të çështjes.