Kryetari i Kuvendit të Kosovës, Glauk Konjufca, ka deklaruar se siguria mbetet parakushti kryesor për çdo proces politik dhe ekonomik, duke theksuar se pa të “asgjë nuk mund të ecë përpara”.

Ai i bëri këto komente gjatë pjesëmarrjes në Forumi Diplomatik i Antalias në Turqi, në një panel të dedikuar për Ballkanin Perëndimor.

“Kur kërcënohet siguria, asgjë tjetër nuk mund të lëvizë përpara. Gjithçka tjetër mbetet peng i saj. Siguria është shkalla e parë e stabilitetit dhe prosperitetit”, u shpreh Konjufca.

Ai iu referua gjithashtu zhvillimeve pas fillimit të luftës në Ukrainë në vitin 2022, duke e cilësuar atë si një pikë kthese për sigurinë në Evropë dhe rajon.

Sipas tij, ndikimi i konfliktit në Ukrainë është reflektuar edhe në Ballkanin Perëndimor, ku ai tha se janë vërejtur tensione të shtuara dhe rreziqe të natyrës hibride.

Konjufca shtoi se zhvillimet globale duhet parë në një kontekst të gjerë gjeopolitik, duke theksuar se stabiliteti në rajon është i lidhur ngushtë me sigurinë evropiane në tërësi.