Kryeministri Edi Rama ka reaguar ndaj lajmeve dhe diskutimeve të fundit në media dhe rrjete sociale, të cilat pretendojnë se qeveria shqiptare po shet ishujt e vendit tek oligarkë apo investitorë të huaj.

Gjatë një bashkëbisedimi me gazetarë ndërkombëtarë, Rama i ka cilësuar këto pretendime si të pavërteta dhe keqinterpretime të qëllimshme të proceseve në zhvillim.

“Nuk ka të bëjë me kush thotë çfarë, por kush prodhon çfarë. Nuk jam këtu për të dëgjuar apo për të përsëritur gënjeshtra. Nëse dikush thotë se ka leje ndërtimi, le ta tregojë. Ka një kompani? Po, sigurisht që ka, por kjo nuk do të thotë se ka një projekt të miratuar,” u shpreh ai.

Kreu i qeverisë theksoi se aktualisht bëhet fjalë vetëm për shprehje interesi dhe jo për vendime të finalizuara, ndërsa shtoi se proceset përfshijnë subjekte private dhe jo tjetërsim të pronës publike.

Rama sqaroi gjithashtu se projektet për Zvërnecin dhe ishullin janë të ndryshme dhe nuk duhet të ngatërrohen mes tyre.

“Zvërneci dhe ishulli janë dy projekte të ndryshme, nuk janë i njëjti projekt. Është shqetësuese kur krijohet një narrativë ku ishujt e Shqipërisë ‘shiten’ dhe projektohet një imazh i pasaktë i vendit,” tha ai.

Sipas tij, problem mbetet përhapja e informacionit të pa verifikuar që, siç u shpreh, deformon realitetin dhe krijon perceptime të gabuara për Shqipërinë.