Drejtuesja politike e Partisë Socialiste në qarkun e Fierit, Belinda Balluku, ka zhvilluar një aktivitet në Apolloni, ku ka theksuar rëndësinë e kujtesës historike dhe lidhjes me të kaluarën në ndërtimin e së ardhmes.

Sipas saj, njeriu ka natyrshëm tendencën të shikojë drejt së ardhmes, por kjo nuk mund të bëhet pa ruajtur rrënjët dhe historinë.

“E zgjodhëm Apollonin për të dhënë një mesazh. Njeriu nga natyra ka tendencë të ëndërrojë të ardhmen, por pa rrënjët, pa memorien historike nuk mund të ndërtohet një e ardhme. Kemi ardhur për të kujtuar ata që vendosën në themel të PS-së kontributin dhe sakrificën,” u shpreh Balluku.

Ajo vlerësoi gjithashtu rolin e të rinjve në proceset zgjedhore në qarkun e Fierit, duke theksuar se ata kanë kontribuar në rezultatin e zgjedhjeve të majit, ku sipas saj është arritur një fitore historike me 12 mandate.

“Kemi dëgjuar gjatë këtij muaji kremtimesh histori dhe kujtime. Të rinjtë nuk e përjetojnë si ishte në ’91 të ishe anëtar i PS-së. Krenarisht e them se qarku i Fierit ka një rini të mrekullueshme që ka kontribuar në fitoren e majit,” shtoi ajo.