Një ngjarje e rëndë është raportuar mbrëmjen e 9 majit në zonën e Lezhë, ku ish-kryetari i Partisë Demokratike në njësinë administrative Dajç të Zadrimës, Sokol Toma, është dhunuar nga persona ende të paidentifikuar.

Sipas të dhënave paraprake, 53-vjeçari është goditur me sende të forta në rrethana ende të paqarta, ndërsa pas ngjarjes është transportuar me urgjencë për mjekim të specializuar në Spitalin e Traumës në Tiranë.

Ngjarja dyshohet të ketë ndodhur rreth orës 22:00 në autostradën Mamurras–Laç, në afërsi të kryqëzimit të Sanxhakut. Deri tani, autorët mbeten të paidentifikuar dhe nuk janë bërë të ditura motivet e sulmit.

Dy ditë pas ngjarjes, Drejtoria Vendore e Policisë Lezhë ka dhënë një njoftim zyrtar, ku konfirmon se grupi hetimor, nën drejtimin e Prokurorisë, ka nisur veprimet intensive për zbardhjen e rastit. Janë sekuestruar pamjet e kamerave të sigurisë në një zonë të gjerë dhe po kryhen veprime të tjera hetimore për identifikimin dhe kapjen e autorëve.

Hetimet vijojnë, ndërsa autoritetet nuk kanë dhënë ende një version përfundimtar mbi motivet e sulmit apo përfshirjen e mundshme të personave të tjerë.