Kryetari i Komunës së Prishtinës, Përparim Rama, ka akuzuar kryeministrin e Kosovës Albin Kurti për përgjegjësi në krizën politike që ka çuar vendin drejt zgjedhjeve të parakohshme.

Në një intervistë për “Ekonomia Online”, Rama u shpreh se situata aktuale nuk është rezultat i funksionimit normal institucional, por i një përplasjeje për pushtet, duke deklaruar: “Kurti nuk kërkon të qeverisë, por lufton për pushtet”.

Deklaratat vijnë në një moment kur Kosova po përgatitet për zgjedhje të parakohshme më 7 qershor, pas dështimit të Kuvendit për të zgjedhur presidentin e ri brenda afateve kushtetuese.

Zgjedhjet zhvillohen në një klimë të tensionuar politike, ndërsa analistët paralajmërojnë për thellim të krizës institucionale, duke qenë se vendi ka hyrë në ciklin e tretë zgjedhor brenda rreth një viti e gjysmë.

Aktualisht, institucionet po funksionojnë me zgjidhje të përkohshme, ndërsa diskutimet politike janë përqendruar te përgjegjësia për bllokimin institucional dhe mënyra e daljes nga kriza.