Fabian Zhilla është larguar nga detyra si shef kabineti pranë SPAK, duke konfirmuar se do të vijojë karrierën e tij pranë Gjykata e Posaçme Kundër Korrupsionit dhe Krimit të Organizuar.

Lajmi u bë publik nga vetë Zhilla përmes një reagimi në rrjetet sociale, ku ai shprehu mirënjohje për bashkëpunëtorët dhe veçanërisht për ish-kreun e SPAK, Altin Dumani.

Në mesazhin e tij, Zhilla e cilësoi eksperiencën trevjeçare në SPAK si “një shkollë të vërtetë përgjegjësie, integriteti dhe përkushtimi ndaj drejtësisë”.

“Kam pasur privilegjin të jem pjesë e një institucioni që mbart një peshë të jashtëzakonshme dhe të punoj me njerëz që çdo ditë përballen me sfida që kërkojnë kurajë dhe karakter të fortë”, shkroi ai.

Ai rezervoi një falënderim të posaçëm për Altin Dumanin, duke theksuar se besimi i dhënë prej tij ka qenë një përgjegjësi e madhe profesionale.

“Besimi i tij ka qenë për mua jo vetëm nder, por edhe një përgjegjësi e madhe që jam përpjekur ta përmbush me përkushtim maksimal”, u shpreh Zhilla.

Në përmbyllje të reagimit, ai theksoi se largohet nga SPAK me respekt për kolegët dhe me bindjen për të vijuar të njëjtin angazhim edhe në detyrën e re pranë GJKKO-së.

“Rruga vazhdon me një vizion po aq kurajoz, që e gjej në GJKKO, me të njëjtin angazhim, pasion dhe përkushtim”, përfundon reagimi i tij.