Gjykata e Posaçme Kundër Korrupsionit dhe Krimit të Organizuar ka pranuar kërkesën për gjykim të shkurtuar për gjashtë të pandehur të dosjes së njohur si “Revanshi”, ndërsa ka refuzuar këtë procedurë për Marklen Haka për shkak të akuzës së rëndë për “vrasje të mbetur në tentativë” në kuadër të grupit të strukturuar kriminal.

Përfitues të gjykimit të shkurtuar janë Aldo Avdyli, Edson Jozwik, Henerigert Mitri, Altin Morina, Jozi Kraja dhe Durim Bami.

Çështja ndaj Hakës është veçuar dhe do të vijojë me gjykim të zakonshëm. Ndërkohë, prokurori i SPAK, Alfred Shehu, kërkoi kohë për paraqitjen e pretencës, ndërsa seanca e radhës u caktua më 20 maj.

Sipas hetimeve të SPAK, komunikimet e zbardhura nga platforma SKY ECC kanë nxjerrë në pah veprimtarinë e disa grupeve kriminale të përfshira në kultivim narkotikësh, atentate dhe bashkëpunim me struktura policore.

Prokuroria akuzon Aldo Avdylin dhe Jozi Krajën për “sigurim kushtesh për të kryer vrasje” ndaj Durim Bamit, ndërsa vetë Bami akuzohet për organizim atentatesh ndaj Arben Ndokës, Tori Xheçukës dhe Erigers Mihasit, si dhe për drejtimin e një grupi të kultivimit të kanabisit në zonën e Niklës dhe Bubqit gjatë viteve 2019-2020.

Ish-efektivi i RENEA-s, Altin Morina, akuzohet si bashkëpunëtor në kultivimin e drogës, ndërsa Henerigert Mitri për favorizim të grupit kriminal. Ndaj Edson Jozwik rëndon akuza për trafik ndërkombëtar narkotikësh.

Dosja “Revanshi” përfshin hetime mbi 12 ngjarje kriminale të ndodhura ose të parandaluara gjatë vitit 2020 në qytete si Lezhë, Durrës, Tiranë, Vlorë dhe Burrel.

Më herët, SPAK ka kërkuar mbi 127 vite burg për një tjetër fraksion të kësaj dosjeje, ku përfshihen emra të njohur të botës së krimit si Emiljano Shullazi, Gjergji Cukali, Astrit Avdyli dhe Xhelal Rraja.