Pas tubimeve të zhvilluara në Hagë, Prishtinë dhe Cyrih, shqiptarët janë mbledhur në protestë edhe në Mynih të Gjermanisë, në shenjë kundërshtimi ndaj vendimit të Dhomave të Specializuara në Hagë për dënimin e ish-krerëve të UÇK-së.

Pamjet nga protesta në Mynih janë publikuar nga platforma “Liria ka Emër”, e cila ka njoftuar për tubimet e diasporës në mbështetje të Hashim Thaçit, Kadri Veselit, Rexhep Selimit dhe Jakup Krasniqit.

Vendimi i Dhomave të Specializuara, i shpallur më 16 shtator, dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet. Në total, dënimet për katër ish-krerët e UÇK-së arrijnë në 81 vjet burgim.

Protesta në Mynih është pjesë e një vale tubimesh të organizuara nga shqiptarët në diasporë pas shpalljes së aktgjykimit.

Tubime janë zhvilluar ose janë paralajmëruar edhe në qytete të tjera të Evropës, përfshirë Cyrihun, Këlnin dhe Vjenën, ndërsa protesta janë raportuar apo planifikuar edhe në Kanada dhe Shtetet e Bashkuara të Amerikës.

Tubuesit shprehin kundërshtimin ndaj vendimit të Dhomave të Specializuara dhe solidaritetin me ish-krerët e UÇK-së, ndërsa organizatorët vijojnë mobilizimin e diasporës shqiptare në vende të ndryshme.