Një raport paraprak i shërbimeve amerikane të sigurisë ka ngritur dyshime se lufta në Iran mund të ketë ndikuar në motivet e personit të akuzuar për tentativën e atentatit ndaj presidentit amerikan Donald Trump gjatë Darkës së Korrespondentëve të Shtëpisë së Bardhë, 10 ditë më parë.

Sipas dokumentit të përgatitur nga Zyra e Inteligjencës dhe Analizës pranë Departamentit Amerikan të Sigurisë Kombëtare, i dyshuari 31-vjeçar, Cole Thomas Allen, kishte “ankesa të shumta sociale dhe politike” dhe shfaqte kundërshti të forta ndaj politikave amerikane në Lindjen e Mesme.

Raporti, i datës 27 prill, thekson se postimet e Allen në rrjetet sociale, ku ai kritikonte ndërhyrjet amerikane dhe konfliktin me Iranin, “mund të kenë kontribuar në vendimin e tij për të kryer sulmin”.

Autoritetet amerikane nuk kanë dhënë ende një motiv zyrtar për ngjarjen, por hetuesit po analizojnë aktivitetin e tij online dhe komunikimet private. Një nga provat kryesore është një email që Allen u kishte dërguar familjarëve natën e sulmit, i përshkruar nga hetuesit si një “manifest”.

Në mesazhin e tij, ai shprehte zemërim ndaj qeverisë amerikane dhe përmendte synimin për të goditur një “tradhtar” që po mbante fjalim, pa përmendur drejtpërdrejt emrin e Trump.

Sipas dosjes hetimore, Allen kishte qëndrime të forta kundër presidentit amerikan dhe besonte se po reagonte ndaj politikave që i konsideronte “moralisht të papranueshme”.

Ndërkohë, FBI vijon hetimet mbi gjurmën dixhitale të të dyshuarit dhe lidhjet e mundshme me grupe apo ideologji ekstremiste.