Komisioni Qendror i Zgjedhjeve i Kosovës ka nisur zyrtarisht procesin e regjistrimit të votuesve jashtë vendit për zgjedhjet e parakohshme parlamentare të 7 qershorit.

Lajmi u bë i ditur nga zëdhënësi i KQZ-së, Valmir Elezi, i cili sqaroi se qytetarët e Kosovës që jetojnë jashtë vendit do të kenë mundësi të aplikojnë për regjistrim nga 6 deri më 17 maj.

Sipas Elezit, diaspora mund të zgjedhë mënyrën e votimit, qoftë fizikisht në përfaqësitë diplomatike të Kosovës apo përmes postës.

“Gjatë kësaj periudhe 12-ditore, të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës. Në momentin e regjistrimit, aplikuesi mund të përzgjedhë individualisht mënyrën se si dëshiron të votojë”, deklaroi ai.

Zgjedhjet e parakohshme për Kuvendin e Kosovës do të mbahen më 7 qershor, ndërsa votimi në ambasada dhe konsullata do të organizohet një ditë më herët, më 6 qershor.

Paralelisht me regjistrimin e diasporës, KQZ ka hapur edhe procesin për ndryshimin e qendrës së votimit brenda komunave.

Elezi bëri të ditur se votuesit do të kenë po ashtu afat deri më 17 maj për të konfirmuar adresën e tyre zgjedhore ose për të kërkuar ndryshimin e qendrës së votimit brenda komunës ku janë të regjistruar.

“Është në vullnetin e votuesve që të ndryshojnë qendrën e tyre të votimit brenda komunës përkatëse ku janë të caktuar si votues”, shtoi ai.

KQZ gjithashtu u ka bërë thirrje qytetarëve të verifikojnë listën votuese dhe të paraqesin eventualisht kundërshtime apo korrigjime gjatë kësaj periudhe.