Presidenti francez Emmanuel Macron, gjatë vizitës së tij në Meksikë, deklaroi se hetimet për vjedhjen spektakolare të bizhuterive nga muzeu i Luvrit po ecin me ritme të shpejta dhe se “autorët do të arrestohen dhe do të gjykohen”.

“Xhevahiret do të gjenden, kemi filluar të arrestojmë një pjesë të bandës që kreu këtë vjedhje,” tha Macron për televizionin Televisa, duke e cilësuar ngjarjen “një tronditje për të gjithë botën”.

Vjedhja ndodhi më 19 tetor, kur disa persona arritën të hynin në muzeun më të vizituar në botë dhe të largoheshin me bizhuteri me vlerë 88 milionë euro. Katër persona janë arrestuar, por sendet e vjedhura nuk janë rikuperuar ende.

Pas kritikave nga Gjykata e Auditorëve për neglizhencë në masat e sigurisë, presidenti Macron premtoi një rishikim të plotë të sistemit të mbrojtjes në kuadër të planit “Rilindja e Re e Luvrit”, që parashikon një hyrje të re madhështore dhe një sallë të dedikuar për “Xhokondën”.

Ndërkohë, drejtuesit e muzeut kanë paraqitur masa emergjente sigurie, duke përfshirë instalimin e kamerave shtesë dhe krijimin e një organi të posaçëm koordinues për mbrojtjen e veprave të artit.