Gjykata e Posaçme kundër Korrupsionit dhe Krimit të Organizuar (GJKKO) ka rrëzuar kërkesën e SPAK për konfiskimin e 20 pasurive në pronësi të Elvin Merlikës, i dyshuar si pjesë e grupit të Ervis Martinajt dhe i kërkuar që nga marsi i vitit 2022 për dyshime mbi përgatitjen e një atentati ndaj Indrit Dokles.

Pasuritë, mes të cilave ndodhen Hotel “Zeus” pranë aeroportit të Rinasit, një polici private dhe disa apartamente, toka dhe automjete, ishin sekuestruar në janar të vitit 2023, pas një vendimi të prokurorit Behar Dibra.

Megjithatë, pas disa seancash, gjyqtari Erjon Bani vendosi të rrëzonte kërkesën për konfiskim dhe të lironte të gjitha pronat, duke iu referuar vendimeve të Gjykatës Europiane të të Drejtave të Njeriut, përfshirë çështjet “Yordanov and others v. Bulgaria” (2023) dhe “Todorov and others v. Bulgaria” (2021).

SPAK pritet të apelojë vendimin, duke kërkuar që Gjykata e Apelit të pranojë konfiskimin e pasurive, që përfshijnë kompani, toka në Kurbin e Priskë, si dhe disa apartamente në Tiranë.

Merlika, ish-bashkëpunëtor i afërt i Martinajt, mbetet në kërkim ndërkombëtar, ndërsa hetimet për aktivitetin e grupit vijojnë nën drejtimin e SPAK.