Ish-kryetarja e Forumit Rinor të Partisë Demokratike (FRPD), Alesia Balliu, ka kritikuar zhvillimet e fundit brenda Partisë Demokratike, duke deklaruar se forca politike ka nevojë për një proces të thellë rinovimi.

Në një prononcim për mediat, Balliu u shpreh se sipas saj, PD nuk mund të fitojë zgjedhjet me Sali Berishën në krye, duke rikthyer në vëmendje edhe deklaratat e ish-ambasadores amerikane në Tiranë, Yuri Kim.

“Kjo parti e ka problemin që kur ambasadorja Yuri Kim tha: ‘Sa kohë të mbani Berishën, do hani bar’. Të gjithë e dinë që me Berishën nuk fitohet dhe partia ka nevojë për rinovim”, deklaroi Balliu.

Duke komentuar emrat e propozuar së fundmi në strukturat e partisë, ish-kryetarja e FRPD-së u ndal edhe te Julia Emiri, për të cilën tha se është bërë e njohur për shkak të protestave, por sipas saj nuk përfaqëson ndryshimin që kërkohet në PD.

“Julia Emiri, emrin e kam dëgjuar për protestën dhe i ati ka qenë i dënuar për grup të strukturuar kriminal. Kjo nuk është ripërtëritja që pritet në PD. Ka shumë zonja në PD që mund ta bënin atë post. Është emër i panjohur për mua”, tha Balliu.

Ajo ngriti kritika edhe për mënyrën se si zhvillohen proceset e brendshme në PD, duke pretenduar se nuk ka një garë reale dhe se vendimmarrja kontrollohet nga një grup i vjetër drejtues.

“Nuk ka garë në PD, jemi me një kupolë të vjetër që drejtohet nga Berisha. Kemi një farsë që nuk ka legjitimitet dhe nuk ka si të jetë alternativë”, u shpreh ajo.

Sipas Balliut, një forcë politike që synon të qeverisë duhet të ketë figura me besueshmëri te publiku.

“Një individ që kërkon të jetë në qeveri nesër duhet të ketë besueshmëri”, përfundoi ish-kryetarja e FRPD-së.