Policia në Greqi është vënë nën akuza pas një hetimi të publikuar nga BBC, i cili pretendon se emigrantë janë rekrutuar për të ushtruar dhunë ndaj emigrantëve të tjerë në kufirin tokësor me Turqinë.

Sipas materialeve të hetimit, përfshirë dokumente të brendshme policore, në disa raste persona të quajtur “mercenarë” dyshohet se janë angazhuar dhe mbikëqyrur nga struktura policore të nivelit të lartë për të shtyrë me forcë emigrantët përtej kufirit.

Hetimi ngre gjithashtu akuza të rënda për trajtim të dhunshëm, ku dëshmitarë pretendojnë se emigrantët janë zhveshur me forcë, janë grabitur, rrahur dhe në disa raste janë raportuar edhe abuzime seksuale. Sipas këtyre pretendimeve, praktika të tilla mund të jenë aplikuar në mënyrë jozyrtare që prej vitit 2020.

Kryeministri grek, Kyriakos Mitsotakis, deklaroi për BBC se nuk kishte dijeni për këto akuza, ndërsa autoritetet nuk kanë dhënë ende një reagim të detajuar zyrtar.

Bëhet fjalë për të ashtuquajturat “pushback”, praktikë e kthimit të detyruar të emigrantëve pa procedura ligjore, e cila konsiderohet e paligjshme sipas të drejtës ndërkombëtare.

Hetimi i BBC-së, në bashkëpunim me organizatën Consolidated Rescue Group, u nis pas një videoje që dyshohet se tregon keqtrajtim të emigrantëve nga persona të armatosur në zonat kufitare.