I akuzuari për kanosjen e moderatorit Alaudin Hamiti ka pranuar fajësinë gjatë seancës fillestare në gjykatë.

Sipas procesit gjyqësor, Liman Berisha e pranoi akuzën pasi ajo u lexua nga prokurori Arian Frrokaj, duke deklaruar se ndihet fajtor për veprimin dhe duke kërkuar falje për ngjarjen. Ai shtoi se nuk ka pasur qëllim të shkaktojë dëm ndaj moderatorit.

Avokati mbrojtës, Gojart Zymberi, e cilësoi rastin si një reagim emocional pa rrezik real dhe kërkoi që klientit të tij t’i jepet një dënim sa më i lehtë, si dhe heqja e masës së arrestit shtëpiak.

Nga ana tjetër, përfaqësuesja ligjore e palës së dëmtuar, Blinera Osmani, deklaroi se kërcënimi ka shkaktuar frikë dhe pasiguri te Hamiti, duke ndikuar në jetën e tij të përditshme dhe gjendjen emocionale.

Vetë Alaudin Hamiti tha në gjykatë se nuk e njeh të akuzuarin dhe nuk ka pasur asnjë konflikt me të, duke kërkuar sqarim mbi arsyet e kërcënimit.

Gjykata miratoi pranimin e fajësisë, ndërsa vendimi përfundimtar dhe masa e dënimit do të shpallen në seancën e radhës. Sipas aktakuzës, rasti lidhet me mesazhe kërcënuese të dërguara në rrjetin social Facebook në nëntor 2024.