Një konflikt i vjetër për motive pronësie mes dy familjeve në fshatin Dedaj të Pukës ka përfunduar me përplasje fizike, duke lënë pas dy persona të plagosur dhe tre të arrestuar.

Ngjarja ka ndodhur një ditë më parë, ndërsa Policia ka nisur hetimet për zbardhjen e plotë të rrethanave të konfliktit.

Sipas të dhënave paraprake, përplasja ka ndodhur mes familjeve Shkreli dhe Istrefi, të cilat dyshohet se prej vitesh kanë pasur mosmarrëveshje për çështje pronësie. Debati mes tyre ka degjeneruar në dhunë, ku dyshohet se janë përdorur sende të forta dhe mjete prerëse.

Në pranga kanë përfunduar shtetasit I. Sh., 67 vjeç, F. Sh., 36 vjeç, djali i tij, si dhe G. I., 34 vjeç. Ndërkohë, ndaj P. I., 60 vjeç, dhe bashkëshortes së tij, F. I., 43 vjeçe, ka nisur procedimi penal në gjendje të lirë.

Si pasojë e konfliktit janë plagosur I. Sh. dhe G. I., të cilët janë transportuar për mjekim në Spitalin Rajonal të Shkodrës dhe ndodhen jashtë rrezikut për jetën.

Pas ndërhyrjes, Policia ka sekuestruar sende dhe mjete që dyshohet se janë përdorur gjatë përleshjes, ndërsa grupi hetimor vijon punën për të përcaktuar dinamikën e ngjarjes dhe përgjegjësinë e secilit prej personave të përfshirë.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.