Protesta kundër qeverisë ka hyrë në ditën e 57-të, ndërsa tubimi i 56-të u mbyll rreth mesnatës me një marshim të qytetarëve në rrugët e Tiranës. Protestuesit deklaruan se nuk do të tërhiqen nga kërkesat e tyre për dorëheqjen e kryeministrit Edi Rama, ndryshimin e sistemit politik dhe krijimin e një qeverie tranzitore.
Në përfundim të protestës, qytetarët u grumbulluan para Komisariatit nr. 3 në Tiranë, ku kërkuan “lirimin e 2 shqipeve” të arrestuara para Parlamentit ditën e enjte.
“Nuk ka besë për të pabesin”, ishte thirrja e protestuesve, si kundërpërgjigje ndaj deklaratave të kryeministrit Edi Rama gjatë fjalimit të tij të fundit.
Tubimi i radhës pritet të zhvillohet sërish para Kryeministrisë, ku mijëra qytetarë kanë paralajmëruar rikthimin në protestë. Kërkesa e tyre, sipas organizatorëve dhe aktivistëve, mbetet e pandryshuar: largimi i kryeministrit Edi Rama.
Protestuesit kanë reaguar edhe ndaj platformës “Besa”, të prezantuar nga Rama gjatë mbledhjes së Grupit Parlamentar të Partisë Socialiste më 24 korrik, të cilën kryeministri e ka cilësuar si një nismë për një marrëdhënie të re me qytetarët.
Nga podiumi i ngritur para Kryeministrisë, aktivistët deklaruan se nuk e pranojnë këtë mesazh, duke pretenduar se qeveria ka humbur besimin e qytetarëve.
Sipas tyre, platforma e re është një përpjekje për të zbutur reagimin qytetar, ndërsa theksuan se protesta do të vijojë deri në plotësimin e kërkesave të tyre.
Protestuesit kërkojnë gjithashtu që kryeministri Rama të përballet me drejtësinë dhe të krijohet një qeveri tranzitore, e cila sipas tyre do të garantojë zhvillimin e zgjedhjeve të lira dhe të ndershme.
Në mbyllje të marshimit në Tiranë, qytetarët brohoritën slogane si: “Rama ik”, “Dorëheqje”, “Ju erdhi fundi”, “Shqipëri e re”, “Revolucion”, “Rama në burg, Berisha në burg”, “Arrestoni Ramën”, “Arrestoni Ballukun” dhe “Shqipëria nuk dorëzohet”.
Protestuesit kanë deklaruar se do të vijojnë tubimet edhe në ditët në vijim, duke mbajtur të njëjtën kërkesë kryesore: largimin e kryeministrit Edi Rama nga detyra.
