Ka nisur seanca plenare në Kuvendin e Shqipërisë, e shoqëruar me debate mes mazhorancës dhe opozitës që në minutat e para të punimeve.

Në hapje të seancës, Niko Peleshi prezantoi pikat e rendit të ditës, duke bërë me dije se Konferenca e Kryetarëve ka miratuar projekt-kalendarin e punimeve parlamentare. Ai theksoi gjithashtu se çdo ministër do të ketë të drejtën e fjalës vetëm një herë gjatë seancës.

Me 74 vota pro dhe vetëm 5 kundër, Kuvendi miratoi bashkimin e interpelancave, një vendim që shkaktoi reagimin e opozitës.

Deputeti i Partisë Demokratike, Xhelal Mziu, e cilësoi këtë vendim të padrejtë, duke kërkuar të drejtën për interpelancë me ministrin e Bujqësisë, Andis Salla.

“Na u anulua pa të drejtë interpelanca. Nuk kërkuam të bëhemi prokurorë, por të ngremë shqetësimet për gjendjen e bujqësisë,” u shpreh Mziu, duke shtuar se sektori ka pësuar rënie të vazhdueshme që prej vitit 2020 dhe se fondet për bujqësinë janë ulur ndjeshëm.

Nga ana tjetër, mazhoranca e justifikoi vendimin me faktin se disa çështje, përfshirë fondet IPARD, janë aktualisht në hetim nga SPAK.

Debatet pritet të vijojnë edhe gjatë seancës, ndërsa opozita ka paralajmëruar kundërshti për mënyrën e zhvillimit të interpelancave në Kuvend.