Seanca plenare në Kuvendin e Shqipërisë është shoqëruar me tensione dhe forma simbolike proteste nga opozita, e cila ka vendosur pankarta në sallë në lidhje me dosjen e AKSHI-t.

Në tavolinat e deputetëve janë vendosur foto të Mirlinda Karçanaj, Ergys Agasi dhe Ermal Beqiri, të përmendur në hetimet për korrupsion dhe abuzime me tenderat publikë.

Lidhur me këtë situatë ka reaguar deputeti i Partisë Demokratike, Klevis Balliu, i cili përmes një postimi në rrjetet sociale ka ngritur akuza të forta ndaj institucioneve shtetërore.

Balliu deklaron se zyrtarët e përfshirë në këtë çështje janë pasuruar në mënyrë të paligjshme, ndërsa sipas tij, qytetarët që protestojnë përballen me presion dhe dhunë nga policia.

“Ata që u bënë ‘sheikë’ me paratë e qytetarëve arrestojnë protestuesit, ndërsa policia përdoret për t’i heshtur,” shkruan ai.

Deklaratat e opozitës vijnë në një moment kur hetimet për çështjen e AKSHI-t vijojnë, ndërsa mazhoranca nuk ka reaguar ende zyrtarisht mbi akuzat e ngritura në seancë.