Bashkëkryetari i Komisionit për Reformën Territoriale, Arbjan Mazniku, deklaroi se reforma e re synon forcimin e rolit të bashkive dhe përmirësimin e shërbimeve për qytetarët, duke theksuar se procesi është i domosdoshëm edhe në funksion të integrimit të Shqipërisë në Bashkimin Evropian.

Në një deklaratë për mediat, Mazniku tha se reforma është konceptuar për t’iu përgjigjur sfidave afatgjata të vendit dhe kritikoi opozitën për mungesën e angazhimit në fazat e para të punës së komisionit.

“Një reformë, e cila të qëndronte në kohë, t’i përgjigjet sfidave që Shqipëria kishte përpara. Për 1 muaj, opozita nuk erdhi, më pas u mor me diskutimin e kalendarit të punës. Në maj të 2027, Shqipëria ka zgjedhjet vendore, duhet të hyjmë me hartë të re territoriale. Në vjeshtën e vitit që vjen, Shqipëria do mbyllë negociatat. Nuk integrohet në BE qeveria, integrohet e gjithë Shqipëria në BE. Të forcojmë bashkitë, të kenë struktura më të forta edhe financiarisht. Nëse humbasim këtë afat, të 2027, humbasim 8 vjet. Kjo reformë bëhet për të mirën e qytetarëve shqiptarë, që bashkitë të ofrojnë shërbimet më të mira të mundshme”, u shpreh Mazniku.

Sipas tij, miratimi i reformës brenda afateve është thelbësor për zhvillimin e zgjedhjeve vendore të vitit 2027 me hartën e re territoriale dhe për përmbushjen e objektivave që lidhen me procesin e integrimit evropian.