Kryeministri izraelit Benjamin Netanyahu ka kritikuar ashpër ministrin e Sigurisë Kombëtare, Itamar Ben-Gvir, pas publikimit të pamjeve ku aktivistë të ndaluar nga Flota Globale Sumud shfaqen të gjunjëzuar dhe të prangosur.

Në video, Ben-Gvir shihet duke iu drejtuar të paraburgosurve dhe duke valëvitur një flamur izraelit, ndërsa ata mbahen me duar të lidhura pas shpine. “Mirë se vini në Izrael, ne jemi pronarët e tokës”, dëgjohet të thotë ai.

Në reagimin e tij, Netanyahu theksoi se Izraeli ka “çdo të drejtë” të ndalojë flotiljet që sipas tij kanë lidhje me mbështetës të Hamasit, por shtoi se mënyra e trajtimit të aktivistëve nuk është në përputhje me standardet dhe vlerat e vendit.

“Veprimet e fundit nuk përfaqësojnë vlerat dhe normat e Shtetit të Izraelit”, u shpreh kryeministri.

Pamjet kanë shkaktuar reagime të forta dhe kritika të gjera, përfshirë edhe brenda vetë qeverisë izraelite.

Ministri i Jashtëm Gideon Sa’ar e ka kritikuar gjithashtu Ben-Gvir, duke deklaruar se ai “i ka shkaktuar dëm të qëllimshëm shtetit me këtë shfaqje të turpshme”, duke shtuar: “Jo, ju nuk jeni fytyra e Izraelit”.