Deputeti i Partisë Socialiste Erion Braçe ka zhvilluar një interpelancë me Ministrin e Infrastrukturës dhe Energjisë, Enea Karakaçi, duke ngritur shqetësime për ndotjen e lumenjve në Tiranë dhe ecurinë e projekteve të kanalizimeve në kryeqytet.

Gjatë fjalës së tij në Kuvend, Braçe deklaroi se situata mjedisore në Tiranë përkeqësohet ndjeshëm gjatë verës, ndërsa theksoi se ujërat e ndotura derdhen në lumin Lana dhe me gjasë edhe në Erzen, sipas një letre të UKT-së.

“Tirana po hyn në javën dhe muajt ku qelbet erë. Ujëra të ndotura, siç më bën me dije UKT përmes kësaj letre, derdhen në lumenjtë e Tiranës”, u shpreh Braçe, duke shtuar se infrastruktura ekzistuese nuk po përballon zhvillimin urban dhe ndërtimet e reja.

Ai ngriti gjithashtu shqetësimin se nuk është shtuar kapaciteti i rrjetit dhe mungojnë impiantet e trajtimit të ujërave të ndotura për zonat e reja të kryeqytetit.

Në përgjigje, Ministri Enea Karakaçi deklaroi se projekti për përmirësimin e sistemit të kanalizimeve është një investim me rëndësi jetike, por ka pësuar vonesa për shkak të problemeve me kontraktorët.

“Parashikohet ndërtimi i impiantit të trajtimit të ujërave të ndotura në Kashar, me kapacitet mbi 94 mijë metra kub në ditë”, tha Karakaçi, duke shtuar se projekti përfshin edhe ndërtimin e kolektorëve kryesorë që do të transportojnë ujërat drejt impiantit.

Sipas tij, projekti financohet përmes një marrëveshjeje huaje me Bankën Japoneze për Bashkëpunim Ndërkombëtar në vlerën rreth 61 milionë euro.

Karakaçi sqaroi se projekti ka nisur para vitit 2016, por është shtyrë disa herë dhe madje kontrata është ndërprerë në mënyrë të njëanshme pas një auditimi. Aktualisht, sipas ministrit, konsulenti ka përfunduar rishikimin teknik dhe pritet të nisë procedura e re konkurruese për zbatimin e tij.