Mes tensioneve dhe përplasjeve publike, presidenti i Serbia, Aleksandar Vuçiç, duket se po ndjek një qasje më të butë diplomatike ndaj Hungarisë, duke kërkuar afrimin me liderin hungarez Peter Magyar.

Vuçiç ka zhvilluar një bisedë telefonike me Magyar, të cilin e ka ftuar për një vizitë zyrtare në Beograd, vetëm pak ditë pas deklaratave të forta dhe akuzave të ndërsjella mes tyre.

Pas fitores në zgjedhje, Magyar kishte hedhur dyshime për lidhje të errëta mes Viktor Orbán, Vuçiçit dhe liderëve të tjerë rajonalë, duke aluduar për ndikime të jashtme dhe marrëveshje të dyshimta politike.

Në reagimin e tij të mëparshëm, Vuçiç i kishte cilësuar këto deklarata si të pavërteta, madje edhe si “budallallëk”. Megjithatë, zhvillimet e fundit tregojnë një ndryshim kursi.

Presidenti serb theksoi se biseda me Magyar ishte konstruktive dhe e fokusuar në përmirësimin e marrëdhënieve dypalëshe, si dhe në çështje të rëndësishme si energjia dhe bashkëpunimi rajonal.

Kjo lëvizje vjen në një kohë kur marrëdhëniet tradicionale mes Serbisë dhe Hungarisë, nën drejtimin e Viktor Orbán, kanë qenë ndër më të afërtat në rajon.

Zhvillimi nënvizon një realitet të njohur në diplomaci: edhe pas përplasjeve dhe retorikës së ashpër, dialogu dhe interesat strategjike mbeten përcaktuese për marrëdhëniet mes shteteve.