Rruga e vjetër nacionale Poliçan-Skrapar ka pësuar dëmtime të rënda si pasojë e shkarjeve të terrenit, duke krijuar rrezik për drejtuesit e automjeteve që kalojnë në këtë aks.

Njëra anë e rrugës ka përfunduar në kanal, ndërsa në pjesën tjetër vijojnë të bien gurë nga zona kodrinore. Pjesa e dëmtuar ndodhet në hyrje të qytetit të Poliçanit.

Edhe pse rruga nuk ka më të njëjtin fluks lëvizjeje si më parë, ajo përdoret çdo ditë nga mjete të tonazhit të rëndë. Në këtë aks kalojnë kamionë që udhëtojnë drejt zonës së malit të Tomorrit për t’u ngarkuar me pllaka guri dekorativ.

Mjetet rikthehen më pas me ngarkesa të mëdha, duke shtuar rrezikun në një rrugë që tashmë është e dëmtuar.

Në zonën problematike nuk ka tabela apo sinjalizime që t’u kërkojnë drejtuesve të mjeteve të tregohen të kujdesshëm gjatë kalimit.

Prej rreth dy muajsh, rruga vijon të jetë në këtë gjendje, ndërsa deri më tani mungon ndërhyrja për riparimin e saj.