Korça u trondit mëngjesin e kësaj të marte nga një ngjarje e rëndë, ku një 66-vjeçar dyshohet se humbi jetën pasi i vuri flakën automjetit të tij dhe u dogj brenda tij.

Ngjarja ndodhi rreth orës 08:40 në lagjen nr. 10 të qytetit. Sipas të dhënave paraprake, viktima, Irakli Çinoku, dyshohet se ka qenë në kushte të rënduara psikologjike në momentin e ngjarjes.

Pas ngjarjes, një fqinj i 66-vjeçarit foli për mediat, duke e përshkruar atë si një njeri korrekt dhe pa konflikte.

“Jemi komshinj. Njeri më të rregullt nuk bën nëna. Ndonjë konflikt nuk di të ketë ai. Në shtëpi shumë i rregullt, ja shikoje, me gjithë këtë pasuri. Konflikte s’ka. Jetonte me gruan, me Vjollcën. Në brendësi të familjes nuk jam. Ishte pensionist, kishte dy djem, një në Angli dhe tjetrin doktor në Greqi.”, u shpreh fqinji.

Sipas tij, nuk ka dijeni që 66-vjeçari të ketë pasur probleme apo konflikte familjare.

Ndërkohë, grupi hetimor vijon punën për të zbardhur plotësisht rrethanat e ngjarjes, ndërsa pritet që hetimet të sqarojnë shkaqet që çuan në këtë tragjedi.