Një 28-vjeçar shqiptar ka humbur jetën në rrethana ende të paqarta në Britaninë e Madhe, ndërsa policia vijon hetimet për zbardhjen e plotë të ngjarjes.

Viktima është Ervin Lita, i njohur edhe me emrin Ervin Axhami, i cili u gjet i plagosur rëndë në një rrugë në qytetin e Leicesterit, mëngjesin e së dielës, më 12 korrik. Pavarësisht përpjekjeve të ekipit të ambulancës për t’i shpëtuar jetën, 28-vjeçari ndërroi jetë në vendngjarje.

Policia e Leicestershire njoftoi se u kontaktua në orën 06:58, pasi Shërbimi i Ambulancës së Midlands Lindore gjeti të riun të plagosur në Compton Road.

Në kuadër të hetimeve, dy persona, përkatësisht 36 dhe 27 vjeç, u arrestuan nën dyshimin për vrasje, por më pas u liruan me kusht, ndërsa procedurat hetimore vijojnë.

Detektivi Kevin Hames deklaroi se autoritetet po punojnë intensivisht për të zbardhur rrethanat e plota të ngjarjes.

“Hetimi ynë mbetet ende në vazhdim. Ne kemi një ekip të përkushtuar që po përparon me një numër hetimesh, ndërsa vazhdojmë të përcaktojmë rrethanat e plota të asaj që ka ndodhur. Kjo përfshin analizën e kamerave të sigurisë, ekzaminimin mjeko-ligjor dhe bisedën me dëshmitarët. Vazhdoj t’i kërkoj kujtdo që ka ndonjë informacion, i cili ende nuk ka folur me ne, të na kontaktojë sa më shpejt të jetë e mundur. Nuk është tepër vonë, prandaj flisni me ne”, u shpreh ai.

Policia britanike ka ngritur gjithashtu një portal të posaçëm për mbledhjen e provave, ku dëshmitarët ose personat që disponojnë pamje nga kamerat e sigurisë apo kamerat e automjeteve mund të ndihmojnë hetimin duke dorëzuar informacionin që kanë.