Ajo u prezantua si një grua në kërkim të një vendi pune, por sipas hetimeve, pas kërkesës për punësim fshihej një plan i mirëorganizuar për të vjedhur biznesin.

Kumrie Zika është arrestuar nga policia, pasi dyshohet se ka marrë rreth 5 mijë euro nga arka e një pike transfertash parash dhe këmbimi valutor në zonën e njohur si “Varri i Bamit”, në Tiranë.

Ngjarja bëhet edhe më e pazakontë për faktin se vjedhja dyshohet të jetë kryer pikërisht në ditën e saj të parë të punës.

Sipas të dhënave hetimore, Zika ishte paraqitur në biznes si e interesuar për t’u punësuar. Për shkak të nevojës për një punonjëse, drejtuesit e pikës vendosën ta rekrutonin, pa dyshuar se vetëm pak orë më vonë do të përballeshin me zhdukjen e një shume të konsiderueshme parash.

Gjatë ditës së parë të punës, ajo qëndroi pothuajse gjatë gjithë kohës nën mbikëqyrjen e një punonjësi tjetër. Por në një moment, kur ai u largua vetëm për pak sekonda, ajo dyshohet se përfitoi për të hapur arkën dhe për të marrë rreth 5 mijë euro.

Pamjet e kamerave të sigurisë kanë regjistruar momentin kur e dyshuara merr paratë dhe largohet me shpejtësi nga biznesi, duke u zhdukur më pas në rrugicat e lagjes.

Pasi konstatuan mungesën e parave, pronarët njoftuan menjëherë policinë. Pas administrimit të pamjeve filmike, efektivët arritën ta identifikonin të dyshuarën.

Vetëm pak orë pas ngjarjes, Kumrie Zika u lokalizua në zonën e “21 Dhjetorit” dhe u vu në pranga. Ajo pritet të dalë para gjykatës për t’u njohur me masën e sigurisë për akuzën e vjedhjes.

Sipas hetimeve paraprake, kjo nuk dyshohet të jetë hera e parë që ajo përdor një skemë të tillë. Policia po verifikon dyshimet se Zika është paraqitur si punëkërkuese edhe në tre ose katër biznese të tjera dhe, pasi është punësuar, ka përfituar për të marrë para nga arkat. Në ato raste, shumat e dyshuara kanë qenë më të vogla.

Një tjetër detaj që ka tërhequr vëmendjen është se emri i saj rezulton edhe në dalje të mëparshme televizive, ku është shfaqur duke dhënë opinione për çështje të ndryshme.

Nga një intervistë pune te prangat brenda pak orësh, historia e dyshuar e Kumrie Zikës ka lënë pas një biznes të dëmtuar me rreth 5 mijë euro dhe një hetim që pritet të zbardhë nëse pas kësaj ngjarjeje fshihet një skemë e përsëritur vjedhjesh.