Dy shtetas shqiptarë janë arrestuar nga Policia Kombëtare dhe Guardia Civil në Spanjë, gjatë një operacioni kundër trafikimit të marijuanës në zonën e Engueras, pranë Valencias.

Sipas autoriteteve spanjolle, dy të arrestuarit akuzohen se kishin ngritur një plantacion të madh marijuane në një zonë natyrore të Sierra de Enguera. Hetimi nisi në fillim të korrikut, pas raportimeve të qytetarëve për lëvizje të dyshimta personash dhe automjetesh në këtë zonë.

Gjatë kontrolleve paraprake, hetuesit konstatuan një sipërfaqe të pastruar dhe zhurma mekanike që dyshohej se vinte nga një gjenerator. Autoritetet vunë re gjithashtu se në të njëjtën zonë, në vitin 2023, ishte zhvilluar një tjetër operacion ku u sekuestruan mbi 1 mijë bimë marijuane dhe u arrestuan tetë shtetas shqiptarë.

Operacioni i përbashkët mes Policisë Kombëtare dhe Gardës Civile u zhvillua më 14 korrik. Gjatë ndërhyrjes, efektivët gjetën barriera metalike dhe kabllo çeliku të vendosura përgjatë rrugëve hyrëse, me qëllim pengimin e automjeteve dhe kontrolleve.

Në zonë u zbulua edhe një sistem i avancuar kamerash që transmetonte pamje në kohë reale, si dhe kamera të fshehura në bimësi për monitorimin e territorit.

Gjatë operacionit u zbuluan rreth 2 440 bimë marijuane, si dhe 90 kilogramë sytha të tharë të paketuar në qese hermetike. Në plantacion u sekuestruan gjithashtu pajisje për përpunimin e drogës, mes tyre një centrifugë për ndarjen e sythave nga kërcelli, peshore precize dhe pajisje për paketim me vakum.

Një nga të dyshuarit u arrestua menjëherë në vendngjarje, ndërsa një tjetër u kap pas rreth 40 orësh kërkimesh. Sipas autoriteteve, ai u gjet i dehidratuar dhe i plagosur në zonën e policisë.

Të arrestuarit, 34 dhe 36 vjeç, me origjinë shqiptare, akuzohen për trafik droge dhe përfshirje në organizatë kriminale.

Hetimi është zhvilluar nga njësitë kundër drogës dhe krimit të organizuar të Policisë së Valencias, në bashkëpunim me Guardia Civil dhe strukturat lokale të sigurisë.

Dosja i është dorëzuar Gjykatës së Xàtivës, ndërsa autoritetet vijojnë hetimet për zbardhjen e plotë të aktivitetit kriminal dhe personave të tjerë që mund të jenë të përfshirë.