Qytetarët do të mblidhen këtë të enjte në bulevardin përpara Kryeministrisë, duke shënuar ditën e 47-të të protestës së tyre me kërkesën për largimin e kryeministrit Edi Rama.

Protesta, e cila nisi si kundërshtim ndaj projektit në zonën e mbrojtur të Zvërnecit, është zgjeruar më tej duke marrë një axhendë më të gjerë politike. Pjesëmarrësit kërkojnë dorëheqjen e kryeministrit, duke ngritur akuza për korrupsion dhe keqqeverisje.

Gjatë tubimeve të përditshme përpara godinës së qeverisë, qytetarët marrin fjalën dhe shprehin shqetësimet e tyre lidhur me situatën politike dhe ekonomike në vend.

Protestuesit deklarojnë se janë të vendosur të vijojnë qëndrimin e tyre dhe se nuk do të tërhiqen deri në realizimin e kërkesës së tyre për dorëheqjen e kryeministrit Edi Rama.