Tre shtetas janë arrestuar nga Policia e Fierit, pasi dyshohet se ushtronin aktivitet të paligjshëm të këmbimit valutor në Fier dhe Lushnjë, pa licencën përkatëse nga autoritetet kompetente.

Operacioni i koduar “Transaksioni” u zhvillua nga specialistët e Seksionit për Hetimin e Krimeve Ekonomike dhe Financiare, në bashkëpunim me Forcën e Posaçme Operacionale, pas kontrolleve dhe verifikimeve në terren.

Në pranga ranë shtetasit R. K., 64 vjeç, E. Sh., 67 vjeç dhe A. I., 57 vjeç, të tre banues në Lushnjë dhe Fier.

Gjatë kontrolleve fizike dhe atyre në banesa, policia sekuestroi shuma të konsiderueshme parash në valuta të ndryshme: 4.2 milionë lekë, 17.300 euro, 1.400 paund, 300 dollarë, 200 franga dhe 2.500 korona, si dhe 5 celularë që dyshohet se përdoreshin në aktivitetin e paligjshëm.

Në vijim të veprimeve hetimore, është proceduar në gjendje të lirë edhe një shtetas tjetër, E. K., 67 vjeç, të cilit gjatë kontrollit fizik i është gjetur një shumë e vogël parash e dyshuar si e përfituar nga këmbimi i kundërligjshëm.

Materialet i janë referuar Prokurorisë për veprat penale “Ushtrimi pa licencë i veprimtarive financiare” dhe “Pastrimi i produkteve të veprës penale ose veprimtarisë kriminale”.