Një 21-vjeçar ka pranuar në gjykatë se kishte planifikuar një sulm të mundshëm gjatë një prej koncerteve të Taylor Swift në Vjenë, të mbajtura në gusht 2024, duke tronditur hetimet për sigurinë e eventit që u anulua në momentet e fundit.

Sipas prokurorisë, i riu i identifikuar si Beran A. dyshohet se vepronte në kuadër të një rrjeti me lidhje ekstremiste dhe kishte nisur përgatitjet disa javë para ngjarjes. Hetuesit thonë se në banesën e tij u gjetën materiale të dyshuara për prodhimin e eksplozivëve, përfshirë edhe një pajisje që ishte thuajse e përfunduar.

Ndërhyrja e policisë u realizua vetëm një ditë para koncertit të parë, pas informacionit të ardhur nga shërbime inteligjente ndërkombëtare. Si pasojë e kërcënimit të vlerësuar si serioz, autoritetet vendosën anulimin e tre netëve të planifikuara të koncertit, të cilat kishin shitur të gjitha biletat dhe pritej të mblidhnin rreth 195 mijë fansa.

Prokuroria e akuzon 21-vjeçarin edhe për shpërndarje propagande online dhe përpjekje për sigurimin e udhëzimeve dhe mjeteve për realizimin e një sulmi të mundshëm. Një tjetër i dyshuar po gjykohet paralelisht për përfshirje në të njëjtin rast.

Pas ngjarjes, Taylor Swift deklaroi se kishte qenë në dijeni të rrezikut gjatë turneut dhe falënderoi autoritetet për parandalimin e një tragjedie të mundshme.