Një sulm kibernetik ka goditur tre aeroporte kryesore në Britaninë e Madhe, duke ekspozuar të dhënat personale të rreth 8.7 milionë pasagjerëve.

Sulmi ka prekur aeroportet e Mançesterit, Londër Stansted dhe East Midlands, të cilat menaxhohen nga Manchester Airports Group (MAG).

Sipas kompanisë, hakerët kanë siguruar akses në të dhëna personale të klientëve, përfshirë adresat e emailit, numrat e telefonit, numrat e regjistrimit të automjeteve dhe kodet postare.

Të dhënat e prekura lidhen me shërbime të ndryshme të aeroporteve, mes tyre parkimi, rezervimet në sallat e pritjes, shërbimet “Fast Track” dhe abonimet Wi-Fi.

Megjithatë, MAG ka theksuar se sistemi i komprometuar nuk përmbante të dhëna bankare apo informacione mbi pagesat e klientëve.

Aeroporti i Stansted u ka bërë thirrje pasagjerëve të tregohen veçanërisht të kujdesshëm ndaj komunikimeve të papritura që mund të përdoren për tentativa mashtrimi.

“Ju nxisim të jeni veçanërisht vigjilentë në rast të emaileve, telefonatave ose mesazheve të papritura që pretendojnë se vijnë nga ne”, thuhet në mesazhin drejtuar pasagjerëve.

Aeroporti ka sqaruar gjithashtu se nuk do t’u kërkojë klientëve në mënyrë të papritur informacione mbi pagesat apo të dhënat bankare.

Manchester Airports Group deklaroi se incidenti është trajtuar menjëherë dhe se kompania po bashkëpunon me ekspertë të sigurisë kibernetike për të mbrojtur klientët dhe sistemet e saj.

Hetimet vijojnë për të përcaktuar autorët e sulmit dhe mënyrën se si është siguruar aksesi në sistemet e prekura.